UN nih Israel mawhchiat a timh nain US nih a kham

UN Security Council chungtel ram pawl cu Israel mawhchiat dingin nizaan ah meeting an tuah nain mawhchiat kho lo dingin US nih a kham hna.

UN Security Council ahhin US telh in ram 15 an um. US, China, France, Russia le Britain ram 5 hna hi zungzal chungtel an si i a taangmi ram 10 cu kum 2 dan in thlen peng an si hna.

Kum 1994 ah Israel nih Palestine minung tampi a rak thah hna hnu in, West Bank peng i Hebron khuapi ah UN nih Caankarlak Ramkip Umpitu Bu (TIPH) a chiah.

TIPH ahhin ramkip minung 64 an i tel, Israel le Palestine buainak kong an hlat, report an chuah peng. TIPH cu Norway ram nih a hruai.

Israel cozah hruaitu Prime Minister Benjamin Netanyahu nih “TIPH hi Palestine a ttanh tuk hna caah Israel nih kan herh lo…” a ti i nizaan tihni ah a tthawl.

Mah ruangah, Israel cu fakpi in mawhchiat dingin Indonesia le Kuwait ram nih UN Security Council ah biatung an dirh. UN Security Council (UNSC) chungtel ram 14 an lungtling dih nain US nih a kham hna.

UNSC nih cathluan a chuah khawhnak ding ahcun chungtel ram dihlak 15 ningin an lungtlin dih a hau. US a lungtlinlo caah Israel mawhchiatnak cathluan cu an chuah kho lo.

UNSC ah biatung dirhnak ca an apmi ah aa ttial ning ahcun, “TIPH hi Hebron khuapi ah a um a biapi tuk, Israel nih na tthawlmi hi cu kan lungrawk taktak, na lungtthul in tthawl hin hna hlah, buainak a karh chin lai…” ti a si.

“Ramkip upadi bangin, Hebron khuapi ah a ummi Palestinians pawl him tein zohkhenh cu Israel na rian a si ve…” ti pawl zong aa tel.

Hebron khuapi cu West Bank pengah khua ngan bik a si. Muslim le Judah (Israel mi) caah hmun thianghlim a si veve caah i cuh in an buai lengmang.

Hebron khuapi ahhin Palestinian muslim ting 2 (200,000) hrawng khua an sa. Israel ralkap vennak tangah Judah (Israel mi) 600 hrawng khua an sa ve.

Palestinian muslim pawl nih kan ram a si an tinak hmun ah Israel nih Judah mi a chiahmi hna hi a diklo, daihnak hrawktu a si, tiah ramkip nih an hmuh.

Nain, US nih UN ah Israel a dirkamh lengmang. Donald Trump nih US President a ttuan hnu hrim cun a dirkamh chinchin. — AFP