Tuzing ah thawngpang tha- Mizoram cozah thimnak ah MNF nih hmun 40 ah hmun 28 hrawngin teinak bual a co tiah thawng kan theih. Vai party a simi Congress le BJP cu vangkau in a thlaak hna. Hi party cu nan theih cio bang Pu Laldenga nih kum 30 miphun dothlennak a rak tuahpimi hna buu an si.

Atu i an hruaitu Pu Zoramthanga le Congress i Pu Lalthanhawla hi kum 2017 lioah an inn ah Kawlram tlangcung parties upa pawl nih kan rak len bal hna.

Pu Zoramthanga nih theihhngalhnak zongin a rak thlau tuk. Vai party zalbei Pu Hawla nihcun, “Kum 30 nawn MNF pawl nih tapung an rak kan thawhpi caah alamkip in hnu ah kan fual dih i kan mipi pawl cozah rian tha zong an tlai kho hna lo” tiah a chim salam ko– a kan deuh ngai.

NLD kuzale pakhat nih “Mizoram zongah miphun/tualtto party cu an sung peng ko cuteh” tiah fawitehlek in a rak ka ti. A taktak ahcun kum 1970 in nihin tiangah Mizoram ah cozah (MLA) thimnak voi 12 a um i cu lakah Vai party nih voi 5 lawng teinak an co i adang voi 7 cu miphun party/buu nih bual an co. (Kum 1972, 1978, 1979, 1984, 1987, 1989, 1993, 1998, 2003, 2008, 2013, 2018 ah thimnak tuah a si i Mizoram People’s Conference nih voi 2, Independents pawl nih voi 2, cun 1987 hnu in miphun party thar a hung dirmi MNF nih voi 3 teinak a hmuh)

Tutan teinak hi anti-incumbency timi Congress cozah mipi nih an ii cang bia zong asi pah ko nain Mizo kan unau pawl cu democracy le federal an ngah cang hnu hmanh ah hitin miphun ah an ifun peng rih tinak a langhtertu asi. Kannih Chinmi cu dothlennak hmanh kan lim hlan ah miphun ah kan hmin kho rih lo.

A taktak ahcun kannih cu kan miphun rawl a hmin rih lo caah buh cung rak com chung awk si rih lo, kan hrulhter sual lai. Federal mahte khuakhannnak kan ngah hnu ahcun zei party i va dir zong kha a poi tuk ti hnga lo nain atu cu a caan si rih lo.

Milu nuai 1300 renglo Vai pawl lakah khua a sami an si nain, nuai khat lawng a simi Mizo pawl cu an mit ral achia lo. Vai pawl zalbeitu men si an itim ti lo. Central cozahpi ah BJP party an tlaih lio a si caah anmah he kan ipeh lo ahcun tiihna an kan chah kanh sual lai, kan caar sual lai, ti an phang lo.

Biafe: Mizo tluk tal in miphun dawtnak (nationalism) kan ngeih lo ahcun kan miphun le kan biaknak kan humhim kho lailo, kan tlau te ko lai. Mizo kan unau pawl an tuahning paoh kan icawn ve awk si tinak si lo nain miphun dawtnak le an biaknak kilvennak lungput an ngeihmi zawn ahcun tii le tlaang tluk deng in an kan thlau rih, cawn tlak an si.

(Thimnak phichuak thukdeuh in kherhhlainak tucu Kawi Van Salai Van Lian Thang nih van tuah te sehlaw a tha- amah hi Mizoram ramkhel kong ahcun kan lakah a thei bik si ko lai)