President Trump le Kim cu February 27-28 Vietnam ah an i tong lai

Washington – US President Donald Trump nih “keimah thawngin North Korea ah raltuk kan hrial khawh. February 27 le 28 khi Vietnam ram ah North Korea President Kim Jongun he avoi 2nk kan i tong lai,” tiah a thanh.

Trump cu US caan Nihnihni zaan kha Hlutdaw ah ram le upadi kong a chim.

US president paoh nih kum fatin January asiloah February ah US Hlutdaw ah ram le upadi kong biachim peng a si.

North Korea he daihnak kan hmuh khawhnak hnga tuah ding tampi a taang rih, nain thla 15 chung North Korea nih missile a hneksak ti lomi hi tthatlei kan panh thluahmah ko ti hmelchunhnak a si, a ti.

“Keimah hi US president ah rak ka thim hna hlah sehlaw, North Korea he ral fakpi kan tho cang lai dah ka ti,” tiah Trump nih a chim.

Kim Jongun he kan i pehtlai daan “a ttha ngai” a ti.

Trump le Kim Jongun cu June 12 ahkhan Singapore ram ah avoi 1nk an rak i tong. US President a ttuan chungah North Korea president a tongmi cu Trump lawng a si rih.

North Korea nih a nuclear hriamnam in US a tlerh peng caah mah hriamnam hi US nih hlawtter a duh.

Singapore ah an rak i ton lio ah “North Korea nih a nuclear hriamnam hlawt in US nih chawlehnak a phihmi hunpiak ve dingin” hna tlaknak an ngei nain North Korea nih a hlaw rih lo.

US Ramdangmi Vuanci Mike Pompeo July thla ah Vietnam ram ah a tlawn lio ah “Vietnam le US cu ral kan i tuk hnu ah ttha tein kan i pehtlai i kan tthangcho tti, Vietnam hi North Korea nih aa cawn awk a si,” a rak ti.

North Korea pehtlaihnak caah US nih a hmanmi Stephen Biegun cu tu zarh chungah North Korea khualipi Pyongyang ah a tlawng lai i Trump le Kim Jongun nih i ceih ding agenda pawl a va suaipi hna lai.

Kum 1950 in 1953 tiang South Korea le North Korea ral a tho. US nih South Korea a rak bawmh. Mah hnu in atutiang North Korea ramri (South Korea ram chung) ah US nih a ralkap 23,000 leng a chiah peng hna caah North Korea nih US a huat taktak.

North Korea nih a nuclear hriamnam hlawt ding cu zumh a um lo ngai.

UN nih, “North Korea nih a nuclear hriamnam sernak pawl cu ral nih hrawh khawh lo dingin a chiah peng ko,” a ti. — Reuters