Senator Dean Smith tawlrel piaknak thawngin liamcia December 3 le 4 ah Australia cozah pi cu kan va ton khawh. Malaysia um Chinmi hna nan caah kan tonmi a si nain, nan konglam kan chim khawhnak dingah Australia phan ciami kan konglam chimh ta hmasa an hau.

Cucaah, cahmai 60 a chahmi cauk pakhat kan chuah. Australia state 5 ah a phan Chinmi vialte an hlawhtlinnak le an tthatnak vialte kan ttial dih i hmanthlak he ttha tein kan tuah. Mah cauk cu Australia cozah lutlai le Lahwahkah Vuanci sinah kan pek.

Mah lio ah a kan timi cu “nanmah nih kan sinah lawmhnak bia chim ding asi lo, kanmah tu hi nan cungah aa lawm ding kan si” a kan ti.

Cucaah, a biapi tukmi cu Malaysia nan um lio ah siseh, khuazei ram kan phak poah ah dingfel tein a nungmi, upadi tangah ttha tein a ummi le rian aa zuammi kan si a hau, ti hi rawnh kaan duh hna.

Cun, kan hmailei lam a tluan khawhnak hnga, kan fale hna hi ttha tein sianginn kan kaiter hna le ca kan thiamter hna a herh.

Malaysia ah sianginn a rak kai tami le ttha tein sianginn a rak kai ta lomi cu Australia an phanh tikah an i dang tuk.

Malaysia Chin ralzaam sianginn ah English, Math, Science, tbk., a rak cawng tami cu Australia an phak tikah fawi tein ca an tei colh i vawlei cung university ttha bik a si vemi pawl ah an kai kho.

Nain, Chinmi tampi cu Malaysia nan um lio ah nan fale ttha tein sianginn nan kai ter hna lo caah atu hi ram thumnak ah university a kai Chin mino an tlawm tuk.

Zei tluk dirhmun har i nan um zongah, a si khawh chungin nan fale sianginn kaiter hna uh. Fellowship le Khrihfabu vialte nih nan fale sianginn kainak tuahpiak hna uh.

Pathian chawva hi nan fale sianginn kaiternak caah hmang uh. Khrihfabu rian cu harnak a tongmi hna bawmh hi asi. Pathian nih a kan fialmi a si. Cucaah, sianginn a kai kho lomi nan fale hna hi ttha tein fim an cawn khawhnak hnga Khrihfabu nih ttuanvo la uh, bawm hna uh.

Atu ka chimmi vialte hi hmailei Chinmi kan caah a si. Fa a ngeimi nulepa vialte i nan hmailei si tthatnak caah a si, tiah cah kaan duh hna.

UNHCR nih Chin ralzaam hlawtnak policy a leet tthannak hnga zong thla cam kan in bawmh hna lai. Pathian nih kan caah a ttha bik in rian a ttuan ko lai.