2008 Phunghram remh kongah mipi nan lungrethei hlah uh
Irrawaddy ramtthen Maubin khua ah "2008 Phunghram kan remhpiak" tiin mipi nih duhnak an langhter lio - 2014

Yangon — 2008 Phunghram remh kongah NLD le Ralkap karlak ah a hung linsa ngai nain, NLD party biachimtu nih “rammi hna phunghram remh kongah nan lungrethei hlah uh, kan ram chung miphun vialte nan duhning in kan remh ko lai,” tiah bia a kamh hna.

“Kan tuahmi hi upadi nih a onhmi si ko. NLD nih cun buainak chuahter lo dingin phungphai kan i ngeih peng, cucaah mipi harnak a pe ding zeihmanh a chuak lai lo. Mipi hna nan lungrethei hin hlah uh tiah kaan nawl hna,” tiah Dr Myo Nyunt nih a chim.

Zarhteni ahkhan Ralkap lutlai pawl nih media sinah thawngthanhnak an tuah i, “NLD nih phunghram remhtu bu dirh a timhmi hi phunghram le Hlutdaw phungphai an buar,” tiah NLD cu ralrin an pek.

“Phunghram buar nih a chuah pimi theipar cu hngak usih law zoh ngat usih,” tiah Major General Tun Tun Nyi nih a chim.

“Phunghram remhtu bu dirh” kong ralkap nih an dohmi cu NLD nih a chalh hna, ralkap he aa bawmmi USDP nih cozah an tlaih lio zongah Hlutdaw nih phunghram a remh ko cuta, remhtu bu an rak dirh i remhmi pawl cu Hlutdaw ah an rak ap ko kha ta, tiah NLD nih a ti ve hna.

USDP (Thein Sein) acozah lio ahcun Phunghram i a huaha lo pawl lawng an remh caah nihin tiang zei pipa tthathnemnak a chuahpi lo.

“Phunghram remh kong ahcun, atu kan tuah ning te hin USDP acozah nih an rak tuah ve ko… zei ruang dah ralkap nih atu thengte cu an doh, USDP nih cozah an tlaih lio ahcun phunghram remhtu bu dirh cu an rak doh ttung lo?” tiah NLD Vice Chairman Dr. Zaw Myint Maung nih a chim.

Zarhpini ah media sin thawngthanh an tuah tthan i ralkap nih “ralkap kan rian cu 2008 Phunghram ven a si, 2008 Phunghram a muru remh an timh lehlam ahcun kan zoh sawsawh naisai lai lo,” tiah ralrin an pek tthan hna.

A muru an timi hi 2008 Phunghram Chapter 1 i 48 basic principles kha an si.

NLD biachimtu Dr. Myo Nyunt nih, “Phunghram a muru cu mipi a aiawhtu le mipi sin in a rami nawlngeihnak a si awk asi,” tiah a chim.

“Ramkhel ah ralkap an i telmi hi phunghram a muru asi tiin an ruah tu ahcun, kan ruahning he aa dang bak,” tiah a chimchap.

Hlutdaw 25% ralkap an simi le ralkap nih vuanci zung 3 an tlaihmi hi NLD nih an duh lo i, ralkap hi “mipi thimmi cozah (mipi uknak/Democracy)” tangah chiah (ramkhel in ralkap chuahter) an duh caah phunghram remh an duh ti a lang.

“Phunghram remh ding tete cu remhtu bu chungtel a simi miphun party pawl le independent MP pawl vialte an lungtlin dih hnu lawngah Hlutdaw ah ap a si te lai.”

“Ralkap nih anmah duhning lawngin phunghram remh an duhmi a lo ko hih. Nain, Kawlram chung miphun vialte nih an duhning in kan remh lai,” tiah NLD biachimtu nih a chimchap.