Malaysia Rammi A Thattu Myanmar Pa An Tlaih Hna

Penang State: Minung 3 thihnak kongah lunghrinhmi minung 10 palek nih an tlaih hna. Tlaihmi lakah 2 cu Myanmar rammi an si i adang 8 cu Thailand rammi an si.

Thah a tongmi 2 cu Malaysia rammi veve, motor chiahnak ah rian a ttuanmi an si. A dang pakhat cu Thailand rammi a si.

August 25 zaanlei 6:30pm ah Malaysia pa pahnih cu an inn hlanmi chungah thah an tong.

Rithaisii a rimi kum 28 Myanmar pa cu a hmun ah palek nih an hmuh, a kut le angki ah thisen aa neh dih. Lainawng a si ttheo lai tiin palek nih an tlaih.

Malaysia pa Sarbudeen Shikander, kum 72 le adang kum 44 pa pakhat (a min an hngalh rih lomi) hi innkhaan 1 a hlang ttimi an si.

George Town khua i Argyll Lam kam ah inn dot 1nk i khaan pakhat an hlang tti. Myanmar pa nih hin an innkhaan chungah a thah hna tiah palek nih an zumh.

Pa pahnih hna cu a zumharmi in sawh an tong, tiah palek nih an chim.

Inn dot 1nk chungah lainawnnak a um lio cu inn tang lamkam ah aa chokmi minung pakhat nih a hmuh caah palek a chawnh hna.

“A hmun ah palek kan phanh cu a kut ah thisen aa nehmi Myanmar pa kan hmuh. Rithaisii a rak ri.”

“Myanmar pa cu kan tlaih pinah, amah he inn a hlang tti Myanmar pa pakhat (kum 52) zong kan tlaih chih.”

“Ni 14 chung bia kan hal hna hnu ah a herh ningin an kong ceih a si te lai,” tiah palek nih an chim.

Case dang

August 25 zaan 10:20pm ahkhan George Town khua tthiam ah, kum 36 Thailand pa thah a tong ve. A nupi le adang Thailand rammi 7 an tlaih hna.

Thah a tongmi Thailand pa Suriya Kanchaiyaphum cu a nupi he Chulia Street Ghaut lamkam inn dot 1nk ah an um. A nupi (kum 38) nih coka ah a thah, tiin palek nih an zumh.

“Mipa hi a nupi he tangka kong bia an i al lio ah a nupi nih namte in a sawh tiin kan zumh,” tiah palek nih an chim.

“Mah inn chungah a ummi minung 14 cu palek nih bia kan hal hna hnu ah minung 7 kan tlaih hna. Kum 30 in 50 karlak lawngte an si.”

“Mipa cu a kehlei ttaang ah namte in sawh a tong. Keimah nih ka sawhmi si ko tiin a nupi nih aa cohlan. A sawhnak namte zong a tai ah aa beimi bag chungah kan hmuh.”

“A vapa a thattu Thailand nu le adang 7 hna cu sakhan ah kan hren ko hna. Zarh 2 chung bia kan hal hna lai i hnu ah a herh ningin an kong ceih a si te lai,” tiah palek bawi Saravanaan nih a chim.

Myanmar rammi 2 le Thailand rammi 8 hna kong cu Lainawng Biaceihnak Upadi Dal 302 (mi a thattu paoh cu thih dantatnak pek si ve seh) in palek nih case an tuah lio a si.

Zeitin na ruah?

Zaangfah na comment ṭial!
Zaangfah tein ka hin a min ṭial