Malaysia Chin ralzaam siangngakchia sinah Nigeria capo minthang Emanuella le Mark Angel an ra

Malaysia – Capo in vawlei a hnintu Nigeria rammi Emanuella le Mark Angel cu tu zaanlei 2pm ahkhan Cheras khua um Chin Siangngakchia Bu (CSO) sianginn ah an ra.

Chin ralzaam siangngakchia pawl sinah thazaang peknak bia tlawmpal an chim hnu ah an ttin.

CSO sianginn ah an rat lio le siangngakchia pawl thazaang peknak bia an chim lio video.

Mark Angel le Emanuella cu Facebook ah hnuzultu 5.4 million an ngei.

Myanmar ram i minta le minatami minthang bik pawl hmanh Facebook ah hnuzultu 5 million an ngei rih hna lo.

CSO Cheras lawngah an kal, CSO sianginn dang ahcun an kal lo, tiah CSO cachimtu saya John Hlei Lian sin in kan theih.

“Atu hi Malaysia ram ah an rung tlawn lio a si. CSO Cheras cachimtu saya Tawk a hawi Nigeria pa nih CSO ah a rung lenpi mi hna a si,” a ti.

Chin Student Organisation (CSO) sianginn cu Malaysia ram chung hmun 5 ah;

  1. CSO Imbi
  2. CSO Cheras
  3. CSO Puchong
  4. CSO Loke Yew le
  5. CSO Sentul tiin a rak um nain kum 1 hnu kum 1 in ram thumnak an kal thluahmah hna i minung an zor chin lengmang caah atu cu CSO Sentul a um ti lo i 4 lawng a taang cang.

Kum 2012 hrawng ahcun sianginn 5 i Chin ralzaam ngakchia dihlak fonh ah 300 hrawng an rak si nain tu kum cu 200 an tling ti lo.

Emanuellla le Mark Angel nih vawlei an hinh hmasa biknak capo video

Mark Angel comedy/capo cu kum 2012 ahkhan Nigeria ram ah an dirh. Capo video pakhat an tarmi hi Youtube le Facebook ah ramkip in minung million tampi nih an zoh tawn.

Youtube zongah hnuzultu (subscribers) 3 million an ngei. Atu lio vawlei cung capo minthang vialte lakah, online ah a lar bik an si ti khawh si. Atang i an capo video hi Facebook ah 22 millions zoh a tong.