Malaysia ah Chin ralzam sianginn dirh hmasabikmi cu CSO Sianginn asi (keimah theih tawk). Cu CSO sianginn nihcun Malaysia Chin hngakchia a lohtlau dingmi tamtuk a kilven hna i fimnak a pek hna. Malaysia ah a lohtlaumi mino cu ramdang an phak hnu zongah remh an har taktak cang.

CSO sianginn an kaimi nih ramdang an phak hnu ah a thathnem taktak hna; basics English, Mathematics, Sciences le Laica thiam cia in ramdang an phan. 2005 thawk in CSO in a chuak i ramdang a phanmi hna mino hi an tam taktak cang. University le Collage a dih i, rian thatha a tlai cangmi zong an tampi cang. 

Cu hna nih ramdang an phak hnu in CSO sianginn caah zeidah an tuah ti ahcun an kutneh a um lo. CSO Saya/mah hlun pawl zong cu thiamthiam. School Holiday caan ah aa volunteer mi mino zong an um lo tluk asi. 

Ralzam in ramthumnak a phanmi Chin Khrihfabu hna le Communities hna zong nih kan dirkamh hna le kan bawmhchanh hna a hau ngaingaimi asi. CSO sianginn ah fale fimnak a rak cawngmi nule pa hna zong an phaknak hmun kip ah; Khrihfa upa, nubu upa, Pastors le Community leaders zong an tam taktak. Ramtha an phak in an philh bak ko hna.

Kan hawi Karen cu an ralzam camp ah sianginn pawl chimlo, Collage/University tiang an dirh i ramkip ummi Karen pawl nih an bawmhchanh hna. Ramkip ummi an mino hna nih pumpek (volunteer) in cachimh rian an va tuan, an hawile Mirang tampi an i kalpi hna.

Clinics an ngeihmi tete zong ah pumpek in Nurse rian an va tuan theu. CSO le Malaysia Chin communities sianginn in a thanglianmi hna, ramdang ah nurses a tuanmi kan farle an tam khawh ning a mak. Malaysia ralzam clinics hna ah pumpek in rian an va tuan ti zong theih a umlo (an um sual ahcun keimah palh). 

CSO sianginn ah lutlai asimi ka hawipa he kan ichawn. “Sianginn hmun 5 ah an ngeih tawnmi cu Ca chimtu Saya/mah umlo ruang le phaisa tangka harsat deuh ruangah an khar thluamah i sianginn hmun 2 lawng ah kan dir kho cang” a ka ti. Cu thawngpang ka theih i, ka ngeihchiat ning a mak. A dangdang Communities sianginn pawl zong mah cucu an ton cuahmah ciomi asi. 

Sayamah/mah te hi pumpek bakin an tuan i nupi fate an hun ngeih cio tik ah sianginn ah tuan awk an tha tilo i pawcawmnak rian dangdang ah an lut, an mawh ve hrimlo. Malaysia i peng le tlang in dirhmi sianginn tam deuh hi Companies, NGOs le Tuluk Churches pawl nih mission rian can ah an bawmh hna ti asi.

Ziah CBCUSA ah Chin Churches 100 leng, Australia ah Churches 30 leng, Canada le Europe lei ah Churches tam ngaingai kan um ko tung. Sianginn pakhat cio itlaih usihlaw kan ifawihtuk dingmi asi. Malaysia kan miphun hawi hna hi kan mission filed ah tanlak awk asi ve ko lo maw? Miphun dang le Tuluk pawl tuan awk mission lawng ah maw an si ne hnga. Kanmah le kanmah ibawmhchan le i sersiam zong hi taan kan lak ve zinpan cu hau ko.

Cattialtu: Ram Tinthei