France ram lei ah a zuangmi vanlawng cu “bomb tlerh” ruangah Sweden ah a ttum

France ram lei ah a zuangmi vanlawng pakhat cu bomb a um tiin an tlerh ruangah rianrang in a kir i Sweden ram i Arlanda airport ah a kir tthan.

Minung 169 an i citmi Norwegian Air company vanlawng cu France ram Nice khuapi ah kal dingin a zuan lio 10:39am ah bomb a um tiin tlerh a tong.

“Tlerhnak thawngpang an theih cangka in vanlawng cu a kir colh,” tiah lakhruak poipang chanhtu zung riantuan Johan nih a chim.

Vanlawng cu airport chung i vanlawng dang he aa hlatnak hmun ah an dirter i minung 169 cu an chuahter thluahmah hna lio a si.

Bomb thiamsang palek pawl nih vanlawng chung cu bomb a um/lo an kawl lio a si.

Vanlawng aa citmi lak ahhin France ram ah tilio i zuam dingin a kalmi Sweden rammi pawl zong an i tel.

“Kan vanlawng DY4321 chungah bomb a um tiin tlerh kan tong. A him lo sual lai tiin Arlanda ah kan kirter,” tiah vanlawng ngeitu company Norwegian Air company nih cathluan a chuah.

Mahca kan ttiall lio tiang ahhin cun, vanlawng chungah bomb a um tak/lo cu an hngal rih lo. Aho te nih dah an tlerh hna ti zong hngalh a si rih lo.

“Aa citmi an chuah dih hnu ah, bomb thiamsang pawl nih vanlawng chung cu an kawl lai,” tiah Sweden palek biachimtu nu Twe Hagg nih a chim. Reuters le 9News Australia